來訪者是真的出自關心、還是只來八卦?

冥皇星王子出世記 (以下部份內容可能令人情緒不安)

10月7日晚開始條腰好似M到咁勁痛,痛到個肚都繃繃緊。

10月8日晚條腰都係咁痛法,訓o左幾個鐘頭就醒o左。

10月9日朝早老公收工返o黎,一齊食早餐之後,其實想訓覺,點知10點開始個肚有D乸住乸住咁,大約15~20分鐘一次,根本訓唔到,仲同Tina、Cheris、芝Go佢地講電話同Whatsapp,問下使唔使咁早入院,點知12點半同Cheris講完電話,去廁所就見到有幾滴紅,就入房同老公講洗個頭就入院,點知老公佢應o左我又訓返…  =.="

下午2點鐘去威記7F登記入院,大約5~10分鐘痛一次,但都唔係好痛,仲有講有笑,不過過o左探病時間,老公唔可以陪我,我一個人o係待產房張床同Tina佢地Whatsapp;入院時問姑娘係咪可以做無痛分娩,姑娘話入o左病房再同病房姑娘講,入到病房,姑娘話要落產房先睇情況。

過o左成個鐘頭,已經2~3分鐘痛一次,都冇人o黎同我檢查,仲俾姑娘問返我而家開o左幾多度,我自己點知自己開o左幾多度喎~  跟住o黎同我檢查o既係西洋女醫生,一D都唔覺得好彩,佢好後生,抽血D手勢又乸西,搞到我一手都係血,都唔知佢係唔係trainee冇乜經驗,幫我檢查開o左幾多度時淨係識得用鉗,整到我好痛,根本check唔到,後來換返個港人醫生幫我用手指check,先check到原來開得1度。

下午4點半穿水,都仲未好痛,仍然係2~3分鐘痛一次;Whatsapp話俾老公知,點知佢冇反應,唔知係咪返o左屋企訓著o左。

過左20分鐘,已經開始1分鐘痛一次,開始比之前痛,唔想講野,Whatsapp搵唔到老公,要Tina幫我打俾佢,點知Tina幫我搵o左佢成大半個鐘頭佢都冇聽電話。

傍晚5點半醫生檢查話開到2度。

差唔多6點老公先出現,o個時已經痛到連Whatsapp都覆唔到;因為我要求做無痛分娩,姐姐俾定套產房衫我換,準備去檢查睇下適唔適合做無痛,我痛到要老公o黎到幫我先換到衫;跟住開始痛到發癲,一痛就咬老公隻手、扯枕頭、打枕頭、扯自己頭髮、扯老公衫褲(爭D想拆埋佢祠堂)、扯床欄、扯自己衫褲、咬自己隻手……總之將我身邊掂到o既野都想摵爛哂佢,痛到想毁滅全世界!!!!

夜晚7點幾,我又痛又眼訓,一痛就喊哂咁聲,成個人震哂,姑娘話7點半可以去產房檢查有冇得做無痛,雖然由待產房推去對面房都只係等o左十幾分鐘,但都好似等o左成個世紀咁耐…

原來對面7E都唔係產房,由於我由早餐之後開始冇食過o野,其實我帶左麵包去醫院但冇食到(因為我冇諗到咁快就痛得咁密,痛密左就食唔到),所以同我吊o左支鹽水,然後姑娘問同我打止痛針好唔好,我都係問佢有冇得做無痛分娩,佢話兩樣o野冇衝突,我記得個個朋友都話止痛針冇用,不過我都係打o左,打o左支針之後,唔知係我本身眼訓到暈、定係打o左支針之後好想訓、定係我痛到暈,總之就係覺得減低o左痛既程度,不過真係減得好少;係呢段模模糊糊期間,我唔痛就唔知係訓著o左定暈o左,子宮一收縮身體就好自然咁用力屙,雖然我知呢個唔係用力o既時間,但我真係控制唔到…

夜晚9點落產房,我問係咪有得做無痛,點知助產士話我已經開到5度,開得咁快,做o左無痛都係嘥…… =.="  我話點都做o左先啦,佢話無痛只係令到我冇咁痛,話我而家咁想屙,做左無痛就屙唔到,係都唔俾我做~

一直都係「唔知訓o左定暈o左→子宮一收縮就控制唔到身體好自然咁用力屙」,迷迷糊糊望下個產房有時得我一個人,望下個鐘唔知呢個狀態要維持幾耐,個人癲喪咁 “典" 到斜哂,有時助產士入o黎望下我,叫我唔好用力屙住,會逼到個B頭仔有個冠,但我根本控制唔到,然後我覺得佢地已經冇我咁好氣。

夜晚11點,助產士同姑娘入哂黎,話我已經開到10度,可以用力屙;咁我push啦~  我仲記得聽產前講座個姑娘教個姿勢,但唔知係咪因為我由早餐之後冇食過o野,定係我之前喊到冇哂氣,我push左幾次,阿B個頭仔都縮返入去,仲俾助產士鬧,話我嗌哂D氣冇氣屙,叫我合埋把口收聲,我肉隨砧板上,冇得反抗,唯有乖乖就範;o係我push既同時,助產士伸隻手想幫阿B個頭仔出o黎,點知佢隻手一撬我下面,我道氣就泄左,個B頭又縮返入去,幾次都係咁,個助產士又鬧我,話我咁樣點生呀……跟住助產士準備幫我剪會陰,唔知係咪因為我之前打o左止痛針既關係,明明個個都話陣痛會痛過剪會陰所以唔覺痛,我就覺得剪會陰好痛喇~  =(  我望下個鐘,都11點幾,超低能咁諗唔知我dum唔dum到波鐘去生雙十B!XDDDD

終於,夜晚11:37,Alien出世喇!成七磅半,勁!!!!!!!

後記(一):生完之後,我好好奇咁問姑娘俾我睇下個胎盤係咩樣,原來胎盤好似一件7成熟o既西冷扒~  XD

後記(二):今次未能夠「成功爭取無痛分娩」,我果然唔係做建制派既材料!XDDDDDDD

發表迴響

Please log in using one of these methods to post your comment:

WordPress.com Logo

You are commenting using your WordPress.com account. Log Out / 變更 )

Twitter picture

You are commenting using your Twitter account. Log Out / 變更 )

Facebook照片

You are commenting using your Facebook account. Log Out / 變更 )

Google+ photo

You are commenting using your Google+ account. Log Out / 變更 )

連結到 %s